Tempotimor (Covalima)-Tersa-feira (28/12/2021) semana ne’e, juventude no komunidade postu administrativu Zumalai, munisípiu Covalima deklara no husu ba João Mariano Saldanha atu kandidata aan ba Prezidente Repúblika Demokrátika Timor-Leste (RDTL) iha período 2022 to’o 2027.
Tuir Portavóz Juventude postu administrativu Zumalai, Florindo da Conenção Pires liuhusi konferénsia impresa katak, haree husi impase polítika ne’ebé akontese husi 2017 to’o agora mak juventude no povu Zumalai deklara totalmente fó apoiu ba kandidatu Prezidente Repúblika ne’ebé la mai husi partidu política, tanba kandidatu ne’ebé ne’ebé mai husi partidu polítikú hamosu de’it impase polítika iha rai laran.
“Relasiona ho situasaun polítika ne’ebé la’o husi 2017 to’o agora, maka ami juventude ho inan-aman husi postu Zumalai hakarak manifesta ami-nia votus konfiasa ba públiku katak, ami husu señor doutór João Saldanha atu kandidata aan ba Prezidente RDTL ho indenpendentemente iha periodu 2022 ate 2027,” dehan Portavór ne’e liuhusi konferénsia imprensa iha Zumali, Tersa (28/12).
Juventude Zumalai apoiu husu João Saldanha atu kompete ba Prezidente RDTL, tanba konsidera iha rekursu ne’ebé bele desenvolve Timor-Leste ba tinan lima oin mai.
“Ami haree katak Timor-Leste persiza duni rekursu umanu ne’ebé iha kapasidade, jestaun di’ak ba dezenvolvimentu nasionál atu nune’e bele garante dezenlvolvimentu inovativu ida, hodi sustentável no ba povu nia moris di’ak, ho ida ne’e ami fiar metin ba Doutór João Mariano Saldanha hanesan rekursu potensiál ida ne’ebé inteletualidade akadémika, ekonomista hatene halo jestaun ba tarefa dezenvolvimentu nian, ami mós haree katak desenvolvimentu iha nasaun doben ida ne’e atu la’o ho di’ak persiza iha ema ekonomista ida, atu nune’e garantia osan povu nian, bele benefisia duni povu nia interese, tanba ne’e ami deklara no husu sei apoiu tomak,” tenik Portavoz ne’e
Entertantu liga ho deklarasaun ne’e juventude no inan-aman iha postu administrativu Zumalai sei esforsu maka’as iha elisaun Prezidente da Repúblika tinan oin hodi fó vitória ba kandidatu independente João Saldanha, la’ós de’it iha postu Zumalai, maibé iha teritóriu tomak liu-liu iha munisípiu Covalima.(*)
