Sigaru Karton Ida Atinje Dollar $1.500

Sigaru marka Marlboro. Foto Google

Tempotimor (Covalima)-Liga ba folin sasan hanesan sigaru, bimoli inklui fos, ne’ebé oras ne’e folin sa’e iha Covalima, taxa aumenta, nune’e importadór sira aumenta folin.

Tuir vendedór husi loja Adeba, Eduardo da Conseiçeião Soares katak, iha tempu liuba kotuk, sigaru karton ida ho folin dólar $781.00, maibé dadaun ne’e karton ida ho dolar rihun $1.500.00, tanba ne’e obriga negosiante hasa’e folin sigaru ho marka LA masu ida dólar $2.00 no Marlboro masu ida ho dólar $2.50 sentavus.

Read More

“Sigaru agora ne’e folin sa’e maka’as, tanba uluk ami sosa ne’e karton ida $781.00 dolar de’it, maibé agora ne’e karton ida ami sosa $1.500 dolar kedas, tanba ne’e maka ami fa’an LA masu ida $2.00, Marlboro $2.50 sentavus, ne’ebé ami hasa’e folin sasan tanba sasan iha ne’ebá ne’e mós sa’e maka’as,” dehan Eduardo ba jornalista sira hafoin hala’o hela nia atividade negósiu iha merkadu Suai, Kinta (19/01).

Eduardo akresenta, kona-ba fos no bimoli mós folin sa’e maka’as, tanba ne’e fos saku ida ho folin $ 14.00 no bimoli kaixa ida dolar $32.00.

“Sasan Seluk mós iha liuliu mina bimoli ne’e, tanba uluk bimoli kaixa ida $22.00, maibé agora ne’e $32.00, depois fos mós uluk ne’e $ 12.00 de’it, agora ami tenke fa’an $ 14.00,” katak Eduardo.

Liga ba mudansa folin sasan iha merkadu Suai ne’e, www.tempotimor.com seidauk halo konfirmasaun ho Autoridade Inspesaun no Fiskalizasaun ba Atividade Ekonómiku, Sanitária no Alimentár (AIFAESA) no Ministériu Turizmu Komersiu no Industria (MTCI) iha munisípiu Covalima, tanba sei okupadu ho servisu. (*)

Related posts